جرب مش هتخسر

ليه دايما كل واحد فينا يرمى أخطاءه على غيره ليه مش بنحاول نواجه الحقيقه وبنهرب منها . ليه بنخاف نقول ان احنا اللى غلطانين او احنا اللى عملنا مش فولان اللى عمل او السبب او ان الحكومه هى السبب . فى حياتنا الشخصيه دايما بنختار شماعه نعلق عليها اخطاءنا بالرغم من ان احنا اللى بنكون عملنا الغلط ده او احنا السبب فيه بس للاسف مش بنقدر نقول كده يا ترى ليه خوف ولا مش عايزين نتحمل مسؤليه ولا علشان ايه بالظبط ؟ اما بقى فى حياتنا العامه اى حد بتواجه مشاكل فى شغله اة فى اى حاجه يعقد ويقول اصل الحكومه السبب اصل بتوع الحكومه ولاد كذا وولاد كذا . ليه بنرمى كل حاجه على الحكومه زى مثلا الشوارع نغقد ونقول اصل الشوارع مش نظيفه والزباله فى كل مكان تلاقنا نعقد نقول اصل الحكومه هى السبب لا مش هى السبب هى مجنش وقالتلك ارمى الزباله فى الشارع صحيح فى سوء تخطيط واضح لأى حد بس بردو ليه مش بنقول لنفسنا ان احنا اللى رامينا الزباله دى فى الشارع ليه بنعقد نقول الرشوه والمحسوبيه صحيح كل حاجه بقت ماشيه كده بس بردو احنا مسؤلين فى جزء كبير عنها المشكله فى ان اللى بياخد رشوه بيستغل سلطات وظيفته وبيتحكم فى مصالح ناس الدقيقه بتفرق معاهم بس الحكومه مقلتلوش ارتشى او خلى فى محسوبيات . الحكومه مسؤله عن حاجات كتير وكوارث كتير محدش يقدر ينكر كده بس مش معنى كده ان هى مسئوله عن كل حاجه مش مسئوله عن رمى الزباله مش مسئوله عن انها تفضل تقول لكل واحد ده صح وده غلط صحيح فى عدم تقدير منها لحاجات كتير لكل المواطن المصرى بس مش معنى كده اننا نكره البلد اننا نشوه سمعته بلدنا فى كل حته او اننا نعلق غلطاتنا عليها وكان مفيش حد بيغلط وهى اللى غلطانه على طول . احنا كلنا فى حياتنا لينا اخطاء ولازم نعرفها وبردو لازم نواجها سواء فى حياتنا الشخصيه او الاجتماعيه الحكومه بردو ليها دور فى مشاكلنا محدش يقدر ينكر بس ليه مش نبدأ بنفسنا الاول ليه منقررش نواجه مشاكلنا ليه منصلحش اخطاءنا بنفسنا مش لازم نقعد نتفرج على طول صلح من نفسك الاول بعدين اطلب من غيرك يصلح نفسه بجد صلح نفسك من جواك بجد يوم ما تعمل كده يوم ما هتجبر اى حد ان كمان يصلح من نفسه حتى لو كانت الحكومه نفسها . جرب تحب الناس جرب متغلطتش جرب متتعصبش صحيح احنا مش ملائكه بس نجرب مش هنخسر حاجه جرب مترميش حاجه فى الشارع جرب متديش رشوه علشان تخلص مصلحتك جرب متجرحش حد ولا تجيب فى سيره حد ولا تتريق على حد علشان انت ممكن فى يوم تكون مكان الشخص ده اوعى تقول استحاله لان ربنا قادر على كل شئ . بجد لو جربنا الحاجات الحلوه قبل الوحشه ممكن نقدر نتغير اكيد كمان هنتغير للاحسن ونغير مجتمعنا للاحسن ممكن كل حاجه تبقى احلى بس لازم نحاول لازم نجرب لازم نتخلى عن مبدأ الشماعه اللى بنعلق عليه حياتنا اخطاءنا ظروفنا جرب تكون راضى باللى قسمه ليك ربنا متبصش لغيرك متقولش يارتنى كان معايا فلوس ده انا كنت هعمل وهعمل وهعمل مين قالك ان لو ربنا كان اداك فلوس كتير كنت هتقدر تعمل حاجه محدش يعرف الغيب غير ربنا ولازم نكون متأكدين ان ربنا هو اللى بيدى كل حاجه وهو اللى بيقسم الرزق وان مش بينسى حد.